Evrika Liseyində xeyriyyə yarmarkası
Ənənəmizə sadiq qalaraq, bu il də Evrika Liseyində xeyriyyə aksiyası təşkil olundu. “Kiçik addımlar, böyük ümidlər” şüarı ilə keçirilən yarmarka şagirdlərdə sosial məsuliyyət, paylaşma və empatiya dəyərlərinin formalaşdırılmasını hədəflədi.
Yarmarkada Evrika Liseyinin şagirdləri tərəfindən hazırlanan müxtəlif əl işləri, tablolar, ev şəraitində hazırlanmış qida və şirniyyatlar satışa çıxarıldı. Şagirdlər bu prosesdə təkcə yaradıcılıqlarını nümayiş etdirməklə kifayətlənmədilər, eyni zamanda xeyriyyəçilik mədəniyyətinin fəal iştirakçılarına çevrildilər.
Aksiya çərçivəsində toplanan vəsait hesabına 16 ailəyə maddi və mənəvi dəstək göstərildi. Bu yardım bir daha sübut etdi ki, kiçik görünən addımlar belə, böyük ümidlərin yaranmasına və həyatlara toxunmağa qadirdir.
Hər il keçirilən bu xeyriyyə yarmarkası Evrika Liseyində təkcə bir tədbir deyil, həm də dəyərlərə əsaslanan təhsil anlayışının praktik təzahürüdür. Bu cür təşəbbüslər şagirdlərin erkən yaşlardan cəmiyyətə faydalı, həssas və məsuliyyətli fərdlər kimi yetişməsinə mühüm töhfə verir.
Evrika Liseyi olaraq inanırıq ki, paylaşmaqla artan ən böyük dəyər ümiddir və bu ümid hər il daha çox ürəyə toxunur.
Şərhlər
